雪隧觀點電子報

訂閱雪隧觀點電子報

按此連結《訂閱電子報》,並選擇<加入群組>或將你的電子郵件信箱傳至Email住址會使用灌水程式保護機制。你需要啟動Javascript才能觀看它,由志工人員協助處理。

No203-原來空氣好是一種幸福

原來空氣好是一種幸福  /柳丁(冬山居民)

 

clip_image002

圖說:工業區工廠煙囪24小時吐著廢氣

照片:孫博萮提供

 

聽到外地人講恁宜蘭是好山好水,以早我會真歡喜,但是自從2007年搬來冬山國中附近住了後,我就會閣怹講冬瓜山空氣無寡好。

 

是安怎講?因為離無一公里有潤泰水泥、離臺化龍德廠二公里、附近閣有羅東鋼鐵、電石廠、信大水泥。

 

最近才知影原來這馬个水泥廠,除了生產水泥以外,竟然是處理事業廢棄物,因為怹个爐溫度足懸,政府為著解決事業廢棄物,就開放水泥廠會使燒廢棄物,水泥廠就等於是隱藏版个焚化爐。但是住戶攏毋知,而且百百款个廢棄物毋知有啥物成份,燒了後个廢氣有啥物毒,誰知?

 

工廠个煙筒排出來个廢氣、煙霧四界飛、四界污染,咱个鼻仔甘那是吸塵器,害我有一陣仔鼻到酸酸个化學味就緊去關窗仔門,然後打去環保局反應,上無打50通以上,可惜無啥路用!後來去菜市仔看有人賣家己種个菜,尤其是葉仔類我嘛攏毋敢買。我最後嚴重到想欲搬茨,但想到我會使搬走,無法度搬个茨邊、學校个學生、無生腳个植物欲安怎是好?只好放棄搬茨个念頭,但嘛無想欲打去環保局,只有關門窗一途,像龜將頭縮起來!一直佇想欲安怎才好?

 

clip_image004

圖說:青天計畫2.0成員拜會宜蘭縣環保局

照片:孫博萮提供

 

好佳在2015年中,醫界、環保團體等組織開始關心空污,尤其是PM2.5對人體个傷害,年底佇臺灣北中南發起空污大遊行,就安呢引起大眾个關心。佇冬瓜山開店个朋友今年嘛開始招有關心空污个公民組成一个團體,真積極佇關心宜蘭个空污,四月个時陣阮作伙去拜會環保局,才知工廠排廢氣一工24小時會使違規40擺,莫怪空氣會歹,心內OS:這是啥物法律啊?2015年環保局欲將相關規定訂佧嚴,風聲傳到業者个耳空,怹攏來反應~麥赫嚴啦!佧慢實施啦!但是居民攏毋知,所以無去挺環保局,實在真無采,向望這馬起開始有閣佧濟人作伙來關心生命个基本權~喘氣,咱需要清氣个空氣啦!

            

延伸閱讀

1. 青天計畫2.0|宜蘭空污資訊揭露平台

2. 冬山、蘇澳空汙 居民有感邀縣長聞,廖雅欣,聯合報,2016.05.28

3. 宜蘭水泥業空污加嚴管制 6月上路,中央社,2016.05.26

4. 防空汙更嚴重 宜蘭排放採總量管制,廖雅欣,聯合報,2016.08.25

5. 縣長怒後 工業區旁哪時不臭?,廖雅欣,聯合報,2016.06.02

6. 【宜蘭 你敢住嗎】幻滅的宜居城市,李又如,新新聞,2016.05.26

 

用LINE傳送

 

相關文章